1644 ფილმის ჩანიშვნა ფილმის ჩანიშვნა გაახმოვანეთ / არ მუშაობს ?

ანდრეი ტარკოვსკი / Andrei Tarkovsky

ანდრეი ტარკოვსკი / Andrei Tarkovsky

ქვეყანა:
წელი:
რეჟისორი:
მსახიობები:
აღწერა:
ანდრეი ტარკოვსკი- საბჭოთა რეჟისორი და სცენარისტი. დაიბადა 1932 წლის 4 აპრილს, 
სოფელ ზავრაჟიეში. მამა- არსენ ტარკოვსკი, ცნობილი საბჭოთა პოეტი, 1941 წელს 
მოხალისედ წავიდა ფრონტზე. ანდრეი დედასთან, მარია ვიშნიაკოვასთან ერთად, 1943 
წელს საცხოვრებლად გადავიდა მოსკოვში. სკოლის დამთავრების შემდეგ, 1951 წელს, 
ანდრეი ჩაირიცხა მოსკოვის აღმოსავლეთმცოდნეობის ინსტიტუტში, არაბისტიკის 
ფაკულტეტზე, თუმცა სწავლა მალევე შეწყვიტა. მიზეზი ფიზკულტურის გაკვეთილზე 
მიღებული ტვინის შერყევა გახლდათ. 1953 წელს მკვლევარ-ექსპედიტორებთან ერთად 
გაემგზავრა ტაიგაში, ტურუხანის რაიონში, სადაც წელიწადზე მეტხანს მუშაობდა. 
ექსპედიციიდან დაბრუნებულმა, 1954 წელს, განაცხადი შეიტანა კინემატოგრაფიის 
სახელმწიფო უნივერსიტეტში, რეჟისურის ფაკულტეტზე.
ტარკოვსკიმ პირველი ფილმი, „მკვლელები“ (1956 წ), ერნესტ ჰემინგუეის ნაწარმოების 
მიხედვით გადაიღო. აღნიშნული სურათი მისი საკურსო ნამუშევარი გახლდათ, სადაც 
ეპიზოდური როლი თვითონაც შეასრულა. ანდრეის შემდეგი ნამუშევარი გახდათ „დღეს 
განთავისუფლება არ იქნება“, რომელიც ალექსანდრ გორდონთან ერთად გადაიღო 1958 
წელს. ახალგაზრდა რეჟისორის 1960 წელს გადაღებული მოკლემეტრაჟიანი სურათი, 
„სატკეპნი და ვიოლინო“, ნიუ-იორკის სტუდენტური ფილმების კონკურსის გამრჯვებული 
გახდა.
ანდრეი ტარკოვსკის პირველი სრულმეტრაჟიანი ფილმი, „ივანეს ბავშვობა“, 1962 წელს 
გამოვიდა კინოეკრანებზე. სურათი ვლადიმირ ბოგომოლოვის ჩანაწერების საფუძველზე 
შეიქმნა. ფილმს დიდი წარმატება ხვდა წილად დასავლეთში. აღნიშნული ნამუშევარი 
ვენეციის კინოფესტივალის მთავარი პრიზის, „ოქროს ლომის“, მფლობელი გახდა.  
წარმატების კვალდაკვალ, რეჟისორი იწყებს მუშაობას ფილმზე „ანდრეი რუბლიოვი“. 
სურათი კინოსტუდია „მოსფილმის“ ბაზაზე შეიქმნა და ის მოგვითხრობს რუსი ხატმწერის, 
ანრეი რუბლიოვის, ცხოვრების შესახებ. ტარკოვსკიმ ფილმზე მუშაობა 1966 წელს 
დაასრულა. აღნიშნული ნამუშევარი მსოფლიო დონის კინო-მოვლენა გახლდათ. პირველად, 
საბჭოთა კინოს ისტორიაში, ეკრანზე წარმოჩინდა რელიგიურ-ფილოსოფიური სახიათის 
პრობლემატიკა. ტარკოვსკისეულმა ესთეტიკამ დასავლელ კინოკრიტიკოსებში დიდი 
სიმპათია დაიმსახურა.
1972 წელს კინოეკრანებზე გამოდის „სოლარისი“, რომელიც რეჟისორმა სტანისლავ ლემის 
ნაწარმოების მიხედვით გადაიღო. ანდრეი ტარკოვსკის ფილოსოფიური ხასიათის 
ნამუშევარმა კანის კინოფესტივალზე ჟიურის გრან-პრი მოიპოვა.
1974 წელს რეჟისორი ასრულებს ფილმზე, „სარკე“, მუშაობას. აღნიშნული სურათი 
გამორჩეულია ტარკოვსკის მდიდარი ვიზუალური ასოციაციებით, რომლის საშუალებითაც 
იგი საკუთარ განვლილ ცხოვრებაზე, ადრეულ ბავშვობასა და მოზარდობაზე მოგვითხობს.
1979 წელს ტარკოვსკი იწყებს მუშაობას ფილმზე „სტალკერი“, რომელსაც  ძმებ 
სტრუგაცკების ნაწარმოები უდევს საფუძვლად. აღნიშნულ სურათზე მუშაობა რეჟისორმა 
1980 წელს დაასრულა. იმავე წელს ანდრეი იტალიაში გაემგზავრა, რათა შეერჩია გადასაღები 
ადგილი შემდეგი ფილმისათვის. მოგზაურობისას, პოეტ ტონინო გუერასთან ერთად,  
გადაიღო დოკუმენტური ფილმი „მოგზაურობის დრო“, რომელიც მისეულ ძებნის პროცესს 
აღწერს. 
1983 წელს დაასრულა მუშაობა ფილმზე „ნოსტალგია“, რომლისთვისაც კანის 
კინოფესტივალზე ჯილდო მიიღო, საუკეთესო რეჟისურისთვის.
1984 წლის 10 ივლისს, მილანში გამართულ პრეს-კონფერენციაზე ტარკოვსკიმ განაცხადა, 
რომ საბჭოთა კავშირში დაბრუნებას აღარ აპირებდა. აღნიშნულის გამო, მთელი საბჭოეთის 
მასშტაბით აიკრძალა მისი ფილმების ჩვენება კინოთეატრებში. 
1985 წელს რეჟისორმა მუშაობა დაიწყო ფილმზე „მსხვერპლშეწირვა“. გადაღების ადგილად 
შვედეთი იქნა არჩეული.  სურათი უკანასკნელი გახლდათ რეჟისორისათვის. 1985 წლის 
დეკემბერში მას ფილტვის კიბოს დიაგნოზი დაუსვეს. აღნიშნული ფაქტის გახმაურების 
შემდეგ, საბჭოეთმა ტარკოვსკის შემოქმედებას აკრძალვა მოუხსნა და მის შვილს უფლება 
მისცა მამის მოსანახულებლად ქვეყანა დაეტოვებინა.
ანდრეი ტარკოვსკი გარდაიცვალა პარიზში, 1986 წლის 29 დეკემბერს. დაკრძალულია სენ ჟენიევ დე-ბუას რუსულ სასაფლაოზე.