1238 ფილმის ჩანიშვნა ფილმის ჩანიშვნა გაახმოვანეთ / არ მუშაობს ?

Steve McQueen / სტივ მაკქუინი

Steve McQueen / სტივ მაკქუინი

ქვეყანა: ლონდონი, ინგლისი, დიდი ბრიტანეთი
წელი:
რეჟისორი:
მსახიობები:
აღწერა:
სტივენ როდნი მაკქუინი- ბრიტანელი კინორეჟისორი და სცენარისტი. დაიბადა 1969 წლის 9 
ოქტომბერს ლონდონში, გრენადელი ემიგრანტების ოჯახში. დაამთავრა ჩელსის 
ხელოვნებისა და დიზაინის კოლეჯი. 1990-იანი წლების დასაწყისში ჩაირიცხა „ტიშის 
ხელოვნების სკოლაში“, ქალაქ ნიუ-იორკში. მალევე სწავლას თავი მიანება.
1993 წელს გადაიღო პირველი მოკლემეტრაჟიანი ფილმი „დათვი“. მაკქუინის შემდგომი 
მოკლემეტრაჟიანი ნამუშევრების მსაგავსად, ეს უკანასკნელიც შავ-თეთრი, მუნჯი ფილმი 
გახლდათ. რეჟისორს პირველი წარმატება მოუტანეს მოკლემეტრაჟიანმა ფილმებმა: 
„პირადაპირ ჩემს თავს ზემოთ“ და „უემოციო სახე“. აღნიშნული ნამუშევრებისათვის 
მაკქუინს 1999 წელს ტერნერის პრემია გადაეცა.
რეჟისორის შთაგონების წყაროდ კინემატოგრაფში ფრანგული ახალი ტალღა და ენდი 
უორჰოლი იქცა. იგი საცხოვრებლად ამსტერდამში გადავიდა და ახალ პროექტზე დაიწყო 
მუშაობა. აქვე მან მოაწყო პერსონალური გამოფენა, სახელწოდებით „დედოფალი და 
სამშობლო“, რომელმაც დიდი ინტერესი გამოიწვია არტ- წრეებში. ამ გამოფენით მაკქუინი 
გამოეხმაურა ერაყში მიმდინარე სამხედრო მოქმედებებს. აღნიშნულ გამოფენაზე მან 
წარმოადგინა ომში დაღუპული ბრიტანელი ჯარისკაცების პორტრეტები საფოსტო მარკების 
სახით.
2008 წელს კინოეკრანებზე გამოვიდა რეჟისორის სადებიუტო სრულმეტრაჟიანი ნამუშევარი 
„შიმშილი“, რომელიც მიეძღვნა 1981 წელს ირლანდიის ციხეში მიმდინარე შიმშილობის 
საპროტესტო აქციას. ფილმში მთავარი როლი ირლანდიელმა მსახიობმა, მაიკლ 
ფასბენდერმა შეასრულა. ეს უკანასკნელი სტივ მაკქუინის აღმოჩენად ითვლება. შემდგომში 
მსახიობმა რეჟისორის ყველა პროექტში მიიღო მონაწილეობა.
მაკქუინის დებიუტი დიდ კინოში წარმატებული აღმოჩნდა. მსოფლიო კინოკრიტიკოსებმა 
დადებითი შეფასება მისცეს ფილმს, რომელმაც კანის კინოფესტივალზე „ოქროს კამერა“ 
მოიპოვა, ჯილდო საუკეთესო დებიუტისათვის.
2011 წელს სტივ მაკქუინმა გადაიღო ეროტიული დრამა, „სირცხვილი“. აღნიშნულ 
ნამუშევარში მთავარი როლი მაიკლ ფასბენდერმა შეასრულა. ფილმს დიდი ხმაური და 
წარმატება მოყვა მსოფლიო მასშტაბით. სურათმა 3 ჯილდო მოიპოვა ვენეციის 
კინოფესტივალზე.  იგი ასევე ნომინირებული გახლდათ მთავარ პრიზზე, „ოქროს ლომზე“
2013 წელს კინოეკრანებზე გამოვიდა რეჟისორის რიგით მესამე სრულმეტრაჟიანი 
ნამუშევარი „მონობის 12 წელიწადი“, რომელიც სოლომონ ნორტაპის იმავე სახელწოდების 
მქონე ავტობიოგრაფიული ნაწარმოების ეკრანიზაცია გახლავთ. აღნიშნული ნამუშევარი 
მსოფლიო დონის კინო-მოვლენად იქცა. ფილმი „ოსკარის“ 9 ნომინაციაზე იყო წარდგენილი. 
„ოსკარი“ ნომინაციაში „წლის საუკეთესო მხატვრული ფილმი“ სწორედ აღნიშნულ 
ნამუშევარს გადაეცა.
სტივ მაკქუინი მეუღლეთან, კინოკრიტიკოს ბიანკა სტრიგტერთან, და ორ შვილთან ერთად ამსტერდამში ცხოვრობს.