როგორ იმოქმედა ოლივერ სტოუნის ფილმმა ჯონ კენედის მკვლელობის მასალების გასაჯაროებაზე


როგორ იმოქმედა ოლივერ სტოუნის ფილმმა ჯონ კენედის მკვლელობის მასალების გასაჯაროებაზე


მას მერე, რაც პრეზიდენტმა დონალდ ტრამპმა ტვიტერით განაცხადა, რომ “ჯონ ფიცჯერალდ კენედის მკვლელობის დიდხანს ბლოკირებული და დახარისხებული მასალების გამოქვეყნების ნებართვას იძლეოდა”, აუდიტორია ინტერესით ელოდა 2017 წლის 26 ოქტომბერს, როცა აშშ-ის მთავრობის ხელთ არსებულ გასაიდუმლოებულ დოკუმენტებში დაცული, 34-ე პრეზიდენტის მკვლელობის დეტალები სააშკარაოზე გამოვიდოდა (მოგვიანებით ისევ ტრამპმა აკრძალა მათი გასაჯაროება: დაინტერესებული საზოგადოების რეკომენდაციით, მან რამდენიმე ჩანაწერის გამოქვეყნების უფლება გასცა, შემდეგ კი გადაიფიქრა).

თარიღი შემთხვევითი არ ყოფილა – 1992 წელს კონგრესმა “ჯონ კენედის მკვლელობის ჩანაწერების კრებულის” შესახებ აქტი მიიღო, რომელშიც ეროვნული არქივიდან აღნიშნული დოკუმენტების გამოტანის თარიღად 2017 წლის 26 ოქტომბერი იყო დასახელებული. ამ კანონის მიღებამდე დოკუმენტების გასაჯაროების თარიღად 2029 წელი იყო მითითებული, მაგრამ აქტზე, რომელსაც ჯორჯ ბუშ უფროსმა მოაწერა ხელი, თარიღის შეცვლა მოუხდათ.

რა იყო ამის მიზეზი? – გაგიკვირდებათ და, ერთი მხატვრული ფილმი.

1991 წელს ოლივერ სტოუნის მიერ ჯონ კენედის მკვლელობის კონსპირაციული გეგმის შესახებ გადაღებულმა ფილმმა JFK – გასროლა დალასში ნამდვილი ფურორი მოახდინა. ფილმის სიუჟეტი საკუთარ თეორიას გვთავაზობს იმაზე, თუ სინამდვილეში რა მოხდა დალასში. JFK, მთავარ როლში კევინ კოსტნერით, უფრო დოკუმენტურ დრამას მოგვაგონებს. კოსტნერის პერსონაჟი ჯიმ გარისონი ნიუ-ორლეანის რაიონის რწმუნებული გამომძიებელია, რომელიც პრეზიდენტის მკვლელობის ძიებისას საინტერესო შეთქმულებას ააშკარავებს.

ფილმში წარმოდგენილი ნამდვილი თუ გამოგონილი ფაქტები პრესამ გააკრიტიკა, თუმცა რეჟისორი ამტკიცებდა, რომ ყველა ფაქტი უამრავ კვლევას ეყრდნობოდა და დღემდე თავგამოდებით იცავს აზრს, რომ კენედის მკვლელობის საქმეში ბევრი რამ ცხადი არაა.

როგორ იმოქმედა ოლივერ სტოუნის ფილმმა ჯონ კენედის მკვლელობის მასალების გასაჯაროებაზე


თუმცა ფილმი ყველამ ნახა, ოსკარის რვა ნომინაციაზე იყო წარდგენილი და აქედან ორში გაიმარჯვა კიდეც. და მან საზოგადოებას ის შთაბეჭდილება დაუტოვა, რაც ალბათ გამიზნული ჰქონდა. გაჩნდა უამრავი კითხვა და ხალხი პასუხს ითხოვდა.

ჯონ ფიცჯერალდ კენედის მკვლელობის მასალებზე გამოცემული აქტი სწორედ ამ მოვლენაზე გამოხმაურება იყო. 1998 წელს განაცხადა: “მიუხედავად იმისა, რომ ფილმი მხატვრულია, ინფორმაცია, რომელსაც სტოუნი ფილმის თრეილერში გვაწვდის, მართალია: HSCA (ამერიკის სახელმწიფო მკვლელობათა გამოძიების კომიტეტი) ხელახალი გამოძიების შემდეგ პროვოკაციულ დასკვნამდე მივიდა, თუმცა მასალები 2029 წლამდე გასაიდუმლოებული იყო. კონგრესმა კანონმდებლობა შეცვალა JFK აქტი მასალების ადრეულ გახსნას ითვალისწინებს”.

დღესდღეობით, 2017 წელს, იგივე სიტუაცია მეორდება – პრეზიდენტის მკვლელობიდან 50 წლის შემდეგ უამრავ ამერიკელს სჯერა კენედის მკვლელობის კონსპირაციული გეგმის არსებობა, თუმცა ხელი რეალურად არაფერზე მიუწვდებათ.

დონალდ ტრამპმა კენედის წინააღმდეგ შეთქმულებაში სენატორ ტედ კრუზის მამა პირდაპირ დაადანაშაულა, გაპრეზიდენტების შემდეგ კი აღნიშნული მასალების სააშკარაოზე გამოტანაც მოითხოვა. თავის მხრივ, საკუთარ ფეისბუქ გვერდზე ოლივერ სტოუნმა მას მოუწოდა, სიტყვა შეესრულებინა და ყველაფრის გადაფასება მოეხდინა. შემდეგ კი ვრცელი პოსტი მიუძღვნა ამ საქმეს და საკუთარი თეორიები კიდევ ერთხელ გააცნო საზოგადოებას.

თავის მხრივ, კენედის საქმის მკვლევრები ამ დოკუმენტების გასაჯაროებით განსაკუთრებულს არაფერს მოელიან. მაგრამ მაინც გასაოცარია იმაზე ფიქრი, რომ ერთმა ფილმმა და მასთან დაკავშირებულმა მითქმა-მოთქმამ ნახევარი საუკუნის შემდეგ ასე თუ ისე მივიწყებული საქმე კვლავ დაძრა.

ნახეთ ამ მოვლენებთან დაკავშირებით კვლავ აქტუალურად ქცეული ფილმის თრეილერი:



გაუზიარე პოსტი მეგობარს ♥